买厝送老妈(福州语微小说)
行街中总有漂亮依妹
将卖厝其广告塞我手礼
广告做真漂亮
并且固讲买厝送空调送电视
甚至固有送车其
有侬就开顽笑问
有无送老妈其
依妹面做红红喏无讲话
但是真其发生啰总款事
并且就发生着我身上
我着三山工作有七年唠
一直都是租厝
最近厝价有仂囝降
我妈拍电话来讲，赶紧买厝
汝有厝，下日朋友也好邀
听我妈总款讲我就去注意
小区门口贴其卖厝其广告
90平方，11层，180万
我见觉这厝儥大也儥嫩
位置楼层价格也正好
符合我目前其能力
我看伊伓是中介其广告
是私人自家贴其
我就电话拍过去
接电话其是蜀隻依妹
伊声音真好听
讲会使会使
开门其就是嘻隻依妹
我看见依妹伓啻声音好听
侬也生真俊
我行房里看啰看
复行阳台看啰看
会看见鼓岭鼓山
风景真俊，通风也好
我真满意
我讲依妹汝溪势厝掏卖噜
依妹讲因为疫情
厝也伓好租
固着缴物业费
干脆将厝卖赖去
换礼钱收仂囝利息
我见觉伊讲也有道理
但是希望价格会便宜仂囝
我讲我蜀个侬敆三山工作
每月工资也俪五千
厝租着去蜀千
每月各种开销着千五
无积偌夥钱
汝看175万会使儥
依妹听我总款讲
就讲汝什是真其想买
我讲当然真其
回就175万吧
因为下日汝俪搬裡来住
我共汝就是邻居
侬都讲金乡里银厝边
我讲什乇，蒋样讲会变邻居
伊手比礼对面厝讲
我共我爸就住对面啊
我讲汝蒋样会买
正好两间着对面其厝
拆迁啊，依妹讲
因为拆迁分两套
为啰方便
所以就选蜀楼层其两间厝
我共依妹攀讲其辰候
我看见蜀隻依伯行过来
伊讲依弟啊我这厝
汝安安心买去，厝无问题
因为我现在年纪大去
租厝也真抠气麻烦
我俪蜀隻诸娘囝啊
下日做新妇，我会惊侬
伓是中意侬是注意我其厝啊
诸娘囝手礼厝恰侈儥好
我看见依伯虽然头发都白去
但是侬精神固真好
我搬厝嘻日是礼拜日
依妹也来对手我搬乇做卫生
我看礼依妹其背影就想
依妹俪会做我女朋友就好唠
我讲依妹汝是做什乇其
伊讲伊做先生
难怪汝普通话讲嘻满标准
依妹笑笑，无讲话
我讲汝着底只学校
伊讲着三山实验小学
我讲我去公司也行只条墿
明旦汝就坐我其车去上班
依妹讲伓使啊
我讲汝自家也讲
金乡里银厝边啊
依妹听我总款讲也无声音
总款我每日共依妹齐齐上班
落班辰候再去接伊
礼拜日固带礼伊去七处客遛
但是我固是无敢向伊表白
因为伊是先生啊
只回三山疫情也真严重
我本底想春节转厝看我妈
但现在也无得转去
依伯讲春节去伊嘻边做年
我就买礼酒共熏囝乞依伯
依伯讲伓使只满客气
正好汝来
汝帮我安装囇《会声会影》
我看见依伯房里有两架电脑
原来依伯对电脑固有兴趣
我着公司就是负责计算机管理其
所以安装软件对我是小case
我讲安装真简单
关键是破解
依伯讲就是破解伊做儥来
固是汝后生囝头脑轮活
我看依妹着灶前煮菜
赶紧去对手
总款暝食完我就共依伯
讲啰真侈电脑 络其知识
依伯真感谢我
依伯讲伊爱夹相
就掏《会声会影》礼做视频
我讲伓使只满麻烦
现在都是使手机夹相
真方便
依伯讲手机是方便
但是夹相固是夹相机好
原来依伯对夹相也有研究啊
仱我共依伯罔讲罔粘牢去
有蜀回我问依伯
依妹溪势伓讨朋友噜
依伯就叹气讲
亲戚朋友有乞伊介绍啊
但是伊都儥中意啊
伊讲伊是独身主义
我估计是伊见觉自家是先生
现在先生真食香啊
所以高不成低不就
我想就是因为伊是先生
所以我也一直犹豫啊
仱春节过后无几工
就是情人节唠
我想嚽是蜀只机会
我就买礼蜀架最新其
苹果手机送乞依妹
依妹讲只满贵其手机伊无敢收
我讲依妹，今旦是情人节
我希望汝会我女朋友
依妹面红红喏，头啄啰啄
我估计因为伊共我认识啰
有大半年
对我印象固无呆
所以乍答应其
国庆嘻日我共依妹结婚
按照三山其风俗习惯
请礼喜娘安排婚礼，做真闹热
着婚礼上喜娘介绍
我共依妹认识其过程
最后讲，新郎野合适啊
买厝送蜀隻老妈
仱我共依妹其事计
全三山侬都八传去
甚至全国人民都八传去
我今旦看见抖音悬顶
有侬也写礼我其事计
但是将地址改成重庆去
我估计是着侬家三山
四川囝真侈其原因
其实买厝送老妈总款事计
是真难复制粘贴
我共依妹
会只满巧认识结婚
只能用前世姻缘来解释
依妹讲，什乇前世姻缘
我儥相信，我俪想
我现在卖厝卖折本去
厝是汝其，我也是汝其
我野折本，汝着弥补我
我讲汝也无折本啊
汝钱裡两百万
复讨蜀隻丈夫啊
丈夫真听嘴啊
依妹讲我无管
反正我见觉折本去
汝着弥补我
蒋样弥补，我讲
我看汝妈今旦共我爸
攀讲也真粘牢
我想将汝妈介绍乞我爸
汝看蒋其
我想落想，依妹这想法也真好
总款我也伓使躃来躃去
去照顾我妈唠啊
伊两隻老侬就可以
互相照顾啊
声明：本站部分文章及图片源自用户投稿，如本站任何资料有侵权请您尽早请联系jinwei@zod.com.cn进行处理,非常感谢！